13. Um hv- og kv-

Flestir Íslendingar bera fram kv í orðum sem byrja á hv. Aðeins Sunnlendingar gera greinarmun á kv og hv í framburði. Þess vegna getur nemendum stundum reynst erfitt að ákveða hvort rita skuli hv eða kv í upphafi orða.

Góð regla er þessi:

Spurnarorð hefjast gjarnan á hv.

Dæmi:

Hvar áttu heima?

Hvernig líður þér?

Hvaðan kemur þú?

Hafðu í huga að sum orð geta verið skrifuð bæði með kv og hv og fer það þá eftir merkingunni.

Dæmi:

hver (spurnarorð og goshver)/ kver (lítil bók);

hvað (spurnarorð)/ kvað (þátíð af kveða);

hvalir (sjávarspendýr)/ kvalir (þjáningar);

hviða (vindhviða)/ kviða (kvæði, hljómkviða);

hvísl (hvískur)/ kvísl (heykvísl eða lítil á).