Hugtakið efnisgrein er mikilvægt í allri umræðu um stíl og texta þótt það tengist ekki setningafræðinni beint. Lítum á þessa skilgreiningu:
Skilgreining: Efnisgrein er sá hluti texta sem er á milli greinaskila.
Greinaskil (oftast sýnd í prentuðum texta með inndrætti frá vinstri eða auðri línu) afmarka þannig efnisgreinar. Höfum í huga að efnisgrein þarf að fela í sér tiltekið samhengi, afmarkaða hugsun. Í henni geta verið margar málsgreinar sem tengjast efnislega. En efnisgrein getur einnig verið einungis ein málsgrein. Ein mjög stutt málsgrein sem myndar efnisgrein getur verið áhrifamikil, t.d. strax á eftir langri efnisgrein. Rithöfundar kunna að beita þessu stílbragði, þ.e. að koma lesandanum á óvart með kraftmikilli örstuttri efnisgrein. Veitið slíku eftirtekt þegar þið lesið góða sögu.
Veitið því einnig eftirtekt þegar þið lesið dagblöð að þar eru efnisgreinar yfirleitt fremur stuttar. Góðir blaðamenn gera sér nefnilega grein fyrir því að lesandinn missir gjarnan þráðinn ef honum er íþyngt með langri efnisgrein.