Töluorð tákna tiltekinn fjölda eða ákveðna upphæð. Þau er hægt að skrifa bæði sem tölur og orð. Töluorð greinast í frumtölur og raðtölur.
Athugið að sum orð sem tilheyra öðrum orðflokkum geta óneitanlega minnt á töluorð. Dæmi um slík orð eru:
- einfaldur, tvöfaldur, þrefaldur ... (flokkuð sem lýsingarorð)
- tvisvar, þrisvar ... (flokkuð sem atviksorð)
- níund, tíund, fjórðungur, tugur, tylft ... (flokkuð sem nafnorð, enda taka þau með sér greini!)
Gaman er að velta fyrir sér orðunum þúsund og milljón. Þegar þessi orð taka með sér greini verðum við sennilega að líta á þau sem nafnorð: „Hann geymir allar milljónirnar sínar undir koddanum.“