6. Karen Blixen (1885–1962)

Rithöfundurinn Karen Blixen var dönsk, fædd í Ringsted við Eyrarsund, skammt norðan Kaupmannahafnar. Þar dó hún einnig eftir ævintýralegt líf. Í húsinu þar sem hún fæddist og dó (Ringstedlund) er nú safn helgað minningu hennar.

Faðir Karenar var kammerherrann Dinesen; hann keypti búgarðinn Ringstedlund skömmu áður en Karen fæddist, en hún var yngst fimm systkina. Dienesen veiktist af illvígum sjúkdómi og hengdi sig þegar Karen var aðeins 10 ára en frú Dinesen bjó áfram á búgarðinum og þar skrifaði Karen sínar fyrstu smásögur.

Karen giftist árið 1913, þá 28 ára, sænskum frænda sínum og barón, Bror von Blixen Finecke; hann hafði keypt kaffibúgarð í Kenya og þangað fluttust þau hjónin og þar bjó Karen í 17 ár. Hún skildi reyndar við baróninn 1925 en hafði áður eignast enskan elskhuga, ævintýramanninn og veiðimanninn Denys Finch Hutton að nafni; hann fórst í flugslysi 1931.

Búskapurinn í Kenýa gekk ekki sem skyldi, Karen varð gjaldþrota og hélt heim til móður sinnar í Ringstedlund. Þar settist hún við gamla skrifborðið og skrifaði smásögur, Sjö hrollvekjur, sem strax hlutu afar góðar viðtökur á alþjóðavísu (gefnar út í Ameríku 1934 undir dulnefninu Isak Dinesen). Í Ringstedlund kom Karen sér upp fallegu heimili, og eftir að móðir hennar lést gat hún keypt ættarsetrið. Og hún hélt áfram að skrifa.

Frægasta bók Karenar Blixen er eflaust Jörð í Afríku (1937) þar sem hún lýsir eigin lífi á kaffiplantekrunni í Kenýa. Löngu síðar var þessi saga kvikmynduð og aðalleikararnir voru Meryl Streep og Robert Redford. Tekjur af þessari kvikmynd gerðu það að verkum að hægt var að ljúka við að gera bústaðinn í Ringstedlund að safni. Íbúð Karenar er hluti af safninu, alveg eins og hún var þegar Karen lést. Veggirnir eru m.a. skreyttir mynum frá Afríku og málverkum sem Karen málaði sjálf á Afríkuárunum; þar er einnig mynd af unnustanum Hatton sem hún saknaði mikið. Umhverfið er friðsæl náttúruparadís, og þangað kemur fjöldi manna á hverju ári.

Þrátt fyrir mikið heilsuleysi síðustu árin stundaði Karen ritstörf af kappi. Einnig ferðaðst hún um víða veröld og flutti fyrirlestra. Og í Danmörku flutti hún víðfræg útvarpserindi.

Á hverjum degi settist Karen fyrir framan myndina af Denys Hutton. Síðan gekk hún að svaladyrunum og horfði í suðurátt, til Afríku.

Sagt er að Karen hafi bjargað sér frá örvæntingu með því að fara að skrifa þegar hún kom frá Afríku, gjaldþrota og einmana. Stíll hennar er stíll þess sem „segir sögu“. Frásögur hennar sem urðu til við skrifborðið í Ringstedlund eru sögurnar sem hún hafði sagt þjónustufólkinu sínu í Kenýa og Denys Hatton, manninum sem hún elskaði.